PFSDH: Rejoignez la FUSION pour une militance active. Devenir membre maintenant.

NÒT POU LA PRÈS PATI FIZYON SOSYO-DEMOKRAT AYISYEN

Potoprens, 7 jiyè 2020

Jodi a fè 2 zan, jou pou jou, depi pèp ayisyen an te pran lari pou l te frape pyel byen fò atè pou l te mande Jovenel Moise kite pouvwa a paske l te konstate depi Prezidan sa a enstale nan palè nasyonal mizè a vin pi  rèd andedan peyi a. Madi 7 Jiyè 2020 sa a, nou demokrat nan peyi dayiti konstate avèk anpil enkyetid ke federasyon gang pouvwa egzekitif la ki ap pran lari pou fè yon demonstrasyon zam tout kalib, zam lagè, pistolè, revolvè e latriye. Yo bloke aktivite tout moun pezib depi zòn fontamara, lasalin, wout ayeropò, ba delma e latriye. La polis nasyonal ki la pou pwoteje ak sèvi nan tout peyi Dayiti pa parèt pwent nen li pou mande de ki prevyen. Tandiske ayè lendi a menm polis sa te demantle ak kout gaz lakrimojèn, bal reyèl, sitin yon gwoup jèn tap fè nan zòn ministè la jistis pou mande jistis. Ki donk nou konprann a klè siyal pouvwa egzekitif la voye bay popilasyon an dabò epi annaprè bay opozisyon politik la. Li montre tout sak ekri nan rapò òganizasyon dwa moun yo : FONDASYON JE KLERE ak RNDDH, yo se la verite.

Nou menm nan Pati FIZION Sosyal Demokrat Ayisyen yo nap mande pouvwa egzekitif la pou l bay popilasyon an ak sektè politik opozisyon an esplikasyon sou sak pase jounen madi 7 jiyè a. Kòman de moun la poliis pretann ap chèche depi lontan ki jodi a rive ap fè defile, ap kraze brize gran jounen nan tout lari a san kè sote. Sa montre a klè mouvman sa a genyen sipò moun ki ap dirije peyi a.

Demonstrasyon ki fèt jodi 7 jiyè 2020 sa genyen yon objektif. Pou nou, se yon menas ki dirije sou popilasyon an ak opozisyon an nan batay ki angaje nan zafè fen manda Prezidan an  ki fikse daprè atik 134.2 konstitisyon peyi Dayiti  ak atik 239 dekrè elektoral 2015 la ki te òganize eleksyon ki mete Jovenel Moise Prezidan. Nap di Prezidan an fè yon kout je sou listwa politik peyi Dayiti poul konprann chak fwa yon chèf Leta ayisyen rantre nan vyolans poul rete sou pouvwa li pati pi vit.

Lobèy ki fèt 7 jiyè a montre a klè Prezidan ou pa kapab fè eleksyon nan peyi a. Ki pati politik serye ki pwal rantre nan yon lobèy parèy. Nou konprann eleksyon wap pale a fok chak kandida ta genyen yon mitrayèt nan men dwat li e yon sak lajan nan men goch li. Se sa nou ta rele yon operasyon ant plizyè bann mafya. Sa montre ankò yon lòt fwa ekip ekzekitif ki anplas la pa genyen ankenn dimansyon pou l dirije yon peyi. Pakèt dekrè abrankadabran kap sòti chak semèn yo, vyolasyon konstitisyon peyi a nan domèn sa a te deja montre enkonpetans pouvwa sa a, ajoute ak tout move desizyon ki pran nan jesyon pandemi KOVID 19 la.

PFSDH (FIZYON) ap fè Prezidan an konprann wout vyolans la pa ka rezoud ankenn kriz, li pap ka pèmet ou òganize eleksyon chòvsouri ni chanpwèl, ankò mwens pwolonje mandaw pou ka mete moun paw nan tèt peyi a. Zafè ti pas kout la, apre mwen se mwen an poun kontinye fè menm ti bagay la pa posib ankò. Nou echwe, nou plonje pèp la nan mizè ak dezespwa, pa genyen ni 1 000 goud ni fo 3 000 goud ni menas zam kap fè pèp la fè bak..

Wè pa wè 7 fevrye 2021 fòs pwogresis peyi Dayiti ap mete tout enèji yo ansanm pou yo jete baz yon lòt Ayiti nan enterè tout moun, pòv kou rich, nwa tankou milat, sa ki konn li tankou sa ki pat ale lekol. Se la nap deside konstwi yon pwojè nasyonal pou Ayiti, lè sa a nap genyen  yon peyi kote ayisyen ak ayisyèn ap jwenn bonè yo

 Viv Batay Pèp Ayisyen an,

Tèt ansanm Tèt an plas sa nap chanje sa…

Edmonde Supplice Beauzile, Prezidan

Laisser un commentaire